11/09/2010

16. Les prones d'altesse

 

prunesaltesse.jpg A.yèr', no fî.ye, èl' pu viè.ye, èss't'arrivé.ye avû des pro.nes dè s'pronî. Em' feûme les-a mîs d'vins l'plasse dè d'dière.
Audjordû, dji dé machinal'mint attrapé yeune in passant. Elle est molle sous mes doûs: èle ess't'à drème !
Dj'agne dèdins. Surprije, èsse goût-là, il a laumin què dji l'ai sintu su m'lampas. Ene pètite pointe dè sûr dèvins l'jus bî sucré, ène pèlate bleûse, tauprès nwâre: i n'a pon d'putète, c'èss't'in-altèssse simple !

 Les prones d'altèsse !
Dèvins m'tièsse, èle machine à r'montér l'temps s'a mis in route yè tourne à toute vitèsse.


 

D'aboûr dji mè rvwas tout djambot.

Mès-îs à ras dè l'tâbe toute imbaûdrou.yîée dè farène, dji ravîse èm'grand-mère qui roule yè pètrit n'boule dè pâte.

Avû n'boutèye dè vinègue vûde èle aplatit l'boulot pou d'in fé in bia rond bî plat qu'elle met dvins n'grande platène noire ingressée avû n'plotche dè bûre.

tartesprunes.gifAprès elle prind les quartîs d'prones d'altèsse qu'èle a descoupés yèt les met yun.ye à costé d'l'aute in swîvant l'bourd d'èle platène djusqu'à c'què tout l'surface fuche bî rascouvrie.

Ene poûgné.ye dè suc cristallisé spardûe dsu tout çà. Ele tarte est prèsse yè Mèmère lè stitche dèvin l'four dè l'èstûve.

Qué pléji, in heûre après, d'in mindgî in boquèt co tout tchaud à l'eûre du r'cinér.

 

No vla dij'ans pu târd.

In 1947, nos dallons avû mes parints yè m'pètit frère passer ène dijaine dè djous su les hauteûrs dè Wépion, à l'since d'in cousin dè m'grand-mère.

On esse-t' à pin.ne sortis dè l'guère yè l'cousin.ye Albert, qui a eu l'bon néz dè planter su s'pachî plusieûrs centaines dè pronîs yè d'pwarîs, a signî in contrat avû les « Confitures Materne » pou leû vinde èsse récolte.

prunesaltesse2.gifNos-arrivons tout djûsse, pinvî l' quinje d'aoûsse pou bouter à l'récolte des prones d'altèsse qui sont n'bèqué.ye à l'avance èsse n'année-là.. Em' pa yè mi nos stons imbauchîs pou donner in coup d'main.ye. (Dj'ai 14 ans yè dji monte à squè.ye comme in spirû).

El camion Materne a amin.né in moncha d'batches in bo. Avû in bègna yè 2 tchvaux, Albert les met pa p'tits tas intrès les arbres à coûde. Pu tard, i va r'passer pou rascô.yî les batches rimplis

 

In crochet, in'esquèye in bo qui fait 4 mètes, in sa.ya d'blanc fièr' yè mè vla à l'ouvrâdje, dè 9 eûres djusqu'au din.ner.

El sincî m'a spliquî l'djeu: intrer l'esquèye dè crèsse pou n'nî squèter les p'titès cuches, èle fé tournér pou asplouyè l'dèzeûr conte ène grosse cuche, bî infuterles pîs dvins les ièrbes du pachî yè rimpli l'saya pou qu'i n'susse nî trop p'zant à soul'vér pou dallér l'vûdî dvins lin batche.

Albert n'a nî manquî dè m'dire què dji n'pûs nî arêter d'chufler pou bî moustrer què dji n'mindje pon d'prones! (Après n'dmi-eûre, il est v'nu m'dire què c'astoût l'blague què l'on fjoût à tous les nouvias aprintis !)

Après l'preûmière avant-din.ner, vu m'n'âdje, dji sûs in condjî djusqu'au lend'main(ye). Heureus'mint pasquè dji sûs moulu. (Les-autes coudeûs qui ont coumincî à 7h du matin.ye vont bouter djusqu'à 8 h au nûte.)

Au d'bout dè l'deûzième djournée, on a tauprès fini yè saquans camions sont dja rallés bî quèrtchîs à l'usine dè Jambes.

Dji sûs fièr', passqu'au souper, Albert yè Cécilia m'ont bistoquî !

wepion1946_05.jpg

 

 

 

 

 

 

 

 

 

 

 

 

wepion1947_06.jpg

Texte en français cliquez dans la colonne de droite: "16. Les prunes Altesse"

barres-decorative-9.gif

 

 

 

Écrit par Puvipusot dans Général, Seniors | Commentaires (1)

Commentaires

Wouai ! c'est des bonnes prônes ...
Dj'e les ai peinte dans enne peinture qui est dans'm blog el Dingo. Tu peux dallé les vire si tu'l veut ..
dj'en tchose nier bié el patois et dj'el les mélange;
El montois, el namurois et co el lidgeu parfois.
Allei bonne nute

Écrit par : aramis-dingo | 08/09/2010

Répondre à ce commentaire

Les commentaires sont fermés.